Google+ Followers

2014/12/15

ආදරණීය දිවුල්,





ඔබේ ඇසට අසුවන මායිමේ සිට පහුගිය දිනෙක ජයතිලක බණ්ඩාරයන් හට බිම දමාගෙන පහර දුන්නේය.එප්පාවල ඔබේ ඇසට අසුවන මායිමේ නොවැ? 

නමට ආණ්ඩුකාරවරුන් වන ඔබ වැන්නන් නූල් රූකඩ බව ඇත්ත නමුත් ,හුම් කියාවත් කියාගන්නට බැරි තරමට ඔබ ගොළු වුණේ කොහොමැයි කියා පුදුමැයි.අඳොමැයි !

සමහර විටෙක කපුගේ සිටියා නම් :ඔහු සන්ෆලවර් සමග සාජ්ජ පටියක් රෙකෝඩ් කළ බැව් සත්ත මුත් අපත් සමග එක්වී ඔහුත් මෙසේ කියාවි...... 

මේ තාප්පය පෙරළා දමන්නට .....,

මේ කඩතුරාව  ඉරා දමන්නට....., 

මේ තිමිරය විනිවිද දකින්නට.....  

වරෙන් මලේ පියවර නගලා.


2014/12/09

එකක් කඩතොළු මකන්නට ගොස් .....

'එවිට ස්වාමිවූ දෙවියන්වහන්සේ සර්පයාට කථාකොට, තා මේක කළ බැවින් සියලු තිරිසනුන්ටත් වනයේ සියලු සත්වයන්ටත් වඩා තෝ ශාප ලද්දෙක්ය. තෝ බඩගා යමින් තාගේ ජීවිතයේ සියලු දවස් වලම ධූලි කන්නෙහිය.' -ශුද්ධ බයිබලය



ලංකාවට සර්වජන ඡන්ද අයිතිය හිමිවූයේ ආසියාව තුළ  ඕස්ටේ‍්‍රලියාවටත් ප‍්‍රථමයෙන් බැව් මැතිවරණ කොමසාරිස්වරයා සිහිපත් කරදුන්නේය. එනමුදු වර්තමානයේ දී ජාතියක් සහ රටක් වශයෙන් අප පිළිබිඹු කරමින් සිටින්නේ ඒ පරිණතභාවය නොවේ. කඩතුරාවකින් වසාහෙළන්නට නොහැකි සංස්කෘතික සහජත්වයෙන්ම උරුමව තිබෙන ගෝති‍්‍රක මිලෙජ්චත්වය පරසුද්දන්ගේ නීතියෙන් හෝ දේශපාලනික ඉගැන්වීම් වලින් නවත්වන්නට ඉඩදෙන්නේ කොහොමද ?
ඇසට ඇසක්, දතට දතක්, මහලේකම් වරයෙක්ට මහලේකම්වරයෙක්. රාජපක්ෂ ජනාධිපතිවරයා රටේ සාමය හා ඒකීයභාවය දිනාදෙන්නට පෙරමුණ ගත්තාක් මෙන්ම රටේ දේශපාලනික පක්ෂ කීතු කීතු කරමින් ප‍්‍රජාතන්ත‍්‍රවාදය බිංදුවටම ඇද දමන්නට ද එලෙසම පෙරමුණ ගත් බවට ඉතිහාසය සාක්ෂි දරනු ඇත. අපට නම් වැටහෙන්නේ එකක් කඩතොළු මකාලන්නට දරන උත්සාහයන්ගේ දී සියක් කඩතොළු සාදා ගන්නා බවයි.

2014/11/23

තෝ මා තරවා මම් මුලු ලෝ තරවමි -බුත්සරණ

මෛත්‍රීපාල  සිරිසේන  පොදු අපේක්ෂකයා වශයෙන් කරළියට පැමිණීම, දේශපාලනික සංචලනයන් පිළිබඳව වැඩිමනත් අවබෝධයක් නොතිබූ පක්ෂ,විපක්ෂ සියල්ලන්  කම්පනයට පත් කළේය. මෛති තදබල දේශපාලන තීන්දුවක් ගනු ඇතැයි පූර්ව සැක සංකා ඇති කරගෙන සිටි රාජපක්ෂ රෙජීමය පවා මෛත්‍රීගේ නික්ම යාමෙන් දරුණු දෙදරීමකට ලක්ව සිටිනු බැව් පෙනෙයි.


 ඒ නිසාම මෛත්‍රී යනු ශී ලංකා නිදහස් පක්ෂය නොවන බව කියාපෑම සඳහා මෙන්න නියම ශී ලංකා බඬු යැයි ලේබල් කර පෙන්විය හැකි වර්ගයේ ඇමතිවරුන් කිහිපදෙනෙක් යොදා ගෙන අසාර්ථක පුවතපත් සාකච්ජාවක් ද පවත්වනු ලැබීය. සුසිල්ගේ ,අනුරගේ, ඩලස්ගේ සහ නිමල් සිරිපාලගේ මුහුණු වල හැගීම් විරහිත ස්වභාවය මොනවට කැපී පෙනුණේය.

ජනාධිපතිවරයා මෛත්‍රී ගේ දේශපාලනික තීන්දුව ගණන් නොගන්නා තරමේ එකක් නම් ඔහු කළ යුතුව තිබුණේ තම දේශපාලනික පරිණතභාවය ප්‍රදර්ශනය කරමින් නිහඩව ඉදිරි දේශපාලනික කටයුතුවල යෙදීමයි . නමුත් ඒ වෙනුවට සිදුවූයේ මහින්ද රාජපක්ෂගේ ප්‍රවේණිගත පිටිසර චණ්ඬි ස්වභාවය සහ පන්න පන්නා පළිගැනීමේ වියරුව ප්‍රදර්ශනය කරමින් පැය කිහිපයක් ගතව යන්නට මත්තෙන් මෛත්‍රීගේ සහ ඔහුගේ කණ්ඩායමේ ඇමතිධූරයන් සහ පක්ෂ සාමාජිකත්වය අහෝසි කර දැමීමයි . ඇමතිධූර කෙසේ වෙතත් පක්ෂ සාමාජිකත්වය තහනම් කිරීම ........? මේ මොකක් වුව කළ යුතුව තිබුණේ හෙමින් සීරුවේය.නොඑසේ නම් බොක්සිං වළල්ලක පහරට පහර න්‍යායෙන් නොවේ.නමුත් කටයුතු සිදුවූයේ එලෙසිනි.
දැන් රාජපක්ෂවරුන් භීතියට හා සංශයට පත්ව සිටින්නේඉදිරි ජනාධිපතිවරණයේ දී අව්‍යාජ නිදහස් පාක්ෂීකයන්ගේ තීරණය කුමක් වනු ඇතිද යන සිතුවිල්ල නිසාවෙනි. මක්නිසාද යත් ,මෛත්‍රීපාල සිරිසේනත් ශී ලංකා නිදහස් පක්ෂයත් යනු එකිනෙකින් වෙන් කළ නොහැකි අවියෝජනීය ප්‍රපංචයක් දෙකක් වීම නිසාය. විශේෂයෙන්ම මෛත්‍රී සෑම අවස්ථාවකම පක්ෂය කෙරෙහි තම තදන්තර බැදීම ප්‍රකට කළ අයෙක් වූ අතර ඔහුගේ දේශපාලනික ප්‍රතිපත්තීන්ද පක්ෂයේ ප්‍රතිපත්තීන් සමග ගැටගැසී තිබුණේය. නමුත් මහින්ද රාජපක්ෂ ට තම පක්ෂය සමග එවැනි ගනුදෙනුවක් කිසිදාක තිබුණාද යන්න ගැටළුවකි.තිබුණා නම් ශී ලංකා නිදහස් පක්ෂයේ ප්‍රතිපත්තීන් සමග අහසට පොළව තරම් පරස්පර සම්බන්ධතාවයන් තිබූ යූ.ඇන්.පී කාරයන් ගොන්නක් කැබිනෙට්ටුවට රිංගවාගන්නේ නැත. හොඳම උදාහරණය නම් ශී ලංකා නිදහස් පක්ෂයේ අනාගතය දීප්තියෙන් බබළවන්නට සිටි පහන් තාරකාවක් වූ නාලන්ද එල්ලාවල ඝාතනය කරන ලද සුසන්ත පුංචිනිලමේ හට නියෝජ්‍ය අමාත්‍ය තනතුරක් ලබාදෙමින් නොනැවතී තිකුණාමලයේ නිදහස් පක්ෂ ආසන සංවිධායක ධූරයක්ද ලබාදීමයි . එම්.ඬීකේ.එස් ගුණවර්ධන වැනි උපන් ගෙයි ශීලංකා කාරයින් සත පහකට මායිම් නොකරමින් පුංචිනිලමේ ලා වැද්ද ගැනීම ගැන සැබෑ ශී ලංකා කාරයින්ගේ කළකිරීම ගුණවර්ධනලා මෛත්‍රී සමග එක්ව එළියට බැසීමෙන් ප්‍රකට කළේය.

ඒ නිසාම මෛත්‍රී ගේ නික්ම යෑම හුදු හුදකලා නික්ම යෑමක් නොව ඉදිරි ජනාධිපතිවරණයේ දී මහින්දගේ සහයට පැරණි ලංකා නිදහස් පක්ෂ මතවාදයන් නියෝජනය කරන, වසර ගණනාවක් තිස්සේ යූ.ඇන්.පී මැර දේශපාලනයෙන් හෙම්බත්ව සිටි නමුත් තමනුත් එවැනි මැර දේශපාලනයක යෙදිය යුතු යැයි නොසිතූ   අව්‍යාජ නිදහස් පාක්ෂිකයන් සහ ඔවුන්ගේ පවුල්වල සාමාජිකයන්ගේ කැමැත්තද සංකේතාත්මකව හැර යාමකි. 

2014/11/16

මඩොල් දුවෙන් ඔබ්බට පැද යන්න.


සිංහලෙන් කියවන අපේ පරම්පරාවේ කිසිවෙකුටත් වික්‍රමසිංහ මහත්තයාගේ මඩොල් දූව පහසුවෙන් මතකයෙන් මැකී යන්නේ නැහැ.උපාලි ගිනිවැල්ලේ ,ජින්නා,පොඩි ගමරාළ, කට්ට කෛරාටික වෙට්ට පිත්තල සුරංචියා, අද්භූත ආගන්තුකයෙක් වූ නාගයා,ගිනි වට්ටියක් හිසින් ගත් මිනිසා, මේ හැමදේම පුංචි කාලේ අපේ සුන්දර සිහින මුද්‍රාවන්.යව්වන සාහිත්‍ය රසිකයන් විදිහට අපේ කියවීමේ තිබහ ඇති කළ ලුණුමිරිස වුනේ මඩොල් දූව. උපාලි සහ ජින්නා ගේ කතාව විසින් ඇති කරනු ලැබූ උත්කර්ශය කොතරම්ද යත් මඩොල් දූව කෘතිය ගෙඩි පිටින් කොපි කරමින් කපුටු දූව නමින් පිටු 40 ඇක්සයිස් පොතක කතාවක් ලිවීමටත් මා පෙළබුනා.


අපේ යොවුන් සාහිත්‍යය කෘති එකතුවේ මුදුන් මල්කඩ මඩොල් දූව බවට විවාදයක් නැහැ.තමන්ගේම නව ලෝකයක් සොයා යන ගැටවරයන් දෙදෙනෙකුගේ අභියෝගාත්මක ජීවන සුවිසැරිය මඩොල් දූවේ පමණක් නොව ඉන්පසුව ලියැවුණු බොහෝ යොවුන් නවකතාවල කතා වස්තුව බවට පත්වුණා.නැත්නම් බොහෝ සෙයින් ඊට සමාන කතා වස්තූන් වුණා.මඩොල් දූවේ සංකල්පීය ආකෘතියෙන් ගැළවීමට නොහැකි වූ යොවුන් නවකතා බොහෝ ගණනක් මා කියවා තිබෙනවා.
මඩොල් දූවට පසුව මා ආශාවෙන් කියවූයේ කුලසේන ෆොන්සේකා ගේ යොවුන් නවකතා. යම් යම් සුවිශේෂීතාවයන් තිබුණා වුවත් රංසිරිගේ සංග්‍රාමය ඇරුණු කල ඔහුගේ තුන් යහළු වික්‍රමය, කල්ලන් දූවේ මුතු කොල්ලය සහ සෝමපුර වීරයෝ වික්‍රමසිංහ සූරීන්ගේ මඩොල් දූ ආකෘතියම වූවා.නමුත් රංසිරිගේ සංග්‍රාමය වෙනස්ම මාතෘකාවක් සාකච්ඡාවට ලක්කරනු ලැබුවා.
සිරිල් පෙරේරා නැත්නම් සිරිල් කොඩිකාර හෝ ඊට කිට්ටුවෙන් යන නමක් හිමි ලේඛකයෙක් ගේ අපූරු නවකතා දෙකක් මට තවමත් මතකයි.ඉන් එකක නම වයිටා. පවුලක දරුවන් කිහිපදෙනෙකුගේ සෙනෙහසට මැදිවුණු
බලු සුරතලෙකුගේ කතාවක්.එහි අවසානය එවක ගැටවරයෙක් වූ මගේ හදවත කම්පනය කළා.ඔහුගේම උත්සාහය උක් දණ්ඩක් වැන්නේ යන නවකතාව ද වෙනමම ඉසව්වක් ස්පර්ශ කළ එකක්.තමන්ගේම නිවසක් තනා ගැනීමේ අරමුණෙන් නොපසුබට වීර්යෙන් කටයුතු කරන තරුණයකුගේ ආත්මාවලෝකනය එහි ගැබ්ව තිබුණා. මේ ලේඛකයා විසින්ම රචනා කරන ලද වරුණ සහ උදාර කියන නමින් තවත් පුංචි කතා පොත් දෙකක් කඳවුර කණිෂ්ඨ විදුහලේ පාසල් පුස්තකාලයේ තිබුනා මට මතකයි.
පාළු දූපත කියන්නෙත් මා දැඩි ආශාවකින් කියවූ පොතක්.ඇත්තටම එහි ලේඛකයා නම් මට නිච්චියටම මතක නැහැ.මෙයත් දූපතක හිරවූ කුඩා කොලු ගැටවුන් දෙදෙනෙකුගේ කතාවක්.නමුත් පාළු දූපතේ සුවිශේෂීත්වය වුණේ එහි අන්තර්ගතයට සරල විද්‍යාත්මක කරුණු කාරනා ඇතුළත් කර තිබීමයි.ඇත්තටම එය ඉතා හොඳ සාහිත්‍යමය ප්‍රවණතාවයකට හරවා ගත හැකිව තිබූ නමුත් එසේ වූවේ නැහැ.යොවුන් විද්‍යා ප්‍රබන්ධ සාහිත්‍යක් අපේ රටේ ගොඩ නැගුණේ නැහැ.
ටී.බී ඉලංගරත්නය අඹ යහළුවෝ. මගේ සිත එතරම් තදින් පැහැරගත්ත කෘතියක් නොවෙයි.ඒ ඇයි කියා පැහැදිලි කරන්නට ත් හේතු සාධකත් මට නැහැ.කොහොම නමුත් එතුමාගේම හපනා. මා ඉතා ආශාවෙන් කියෙව්වා. හපනා කෘතියේ අඩංගු වීර වික්‍රමාන්විත ක්‍රියා වලට මගේ ගැටවර සිත ඇලුම් කළා කියලයි මට හිතෙන්නේ.හැබැයි ඇත්තම කීවොත් නම් හපනා ගැන මට තියෙන්නේ සෙවණැලි මතකයක් විතරයි.ඉලංගරත්නයන් ගේ කෘතිවල කිසියම් සාම්ප්‍රදායික ගතියක් ගැබ්ව තිබුණාදෝ කියලාත් මට හිතෙනවා.දුප්පත් පවුලක් ,පොහොසත් පවුලක්, පොහොසත් පවුලෙන් දුප්පත් පවුලට වෙන හිරිහැර ,අන්තිමේ පොහොසත් පවුල පිරිහෙන හැටි.....මෙන්න මේක අර සාම්ප්‍රදායික රාමුවනේ.
කඳවුර කණිෂ්ඨයේ දී තමයි මම වැඩිපුරම පොත් කියෙව්වේ. ඒ පුංචි පුස්තකාලයේ පැපොල් ගහ කන්දේ අභිරහස කියලා පොතක් තිබුණා මට මතකයි.ඒක මම ආශාවෙන් කියෙව්වා කියලත් මතකයි.නමුත් මොන වගේ කතාවක් ද කියලා හරි, කතුවරයා කවුද කියලා හරි මට හරියටම නිච්චියක් නැහැ.
දොන් පීටර් පියතුමා හරි ඊට සමාන නමක් තියෙන කතෝලික පියතුමෙක් ලියූ විදුහලේ විත්ති. කියන පොතත් හරිම අපූරු වෙනස්ම මානයකින් ලියවුණු යොවුන් නවකතාවක්.ඒ කතුවරයාම ලියූ තවත් අපූරු පොතකින් උපුටා ගත්තු කොටසක් අපේ 5 වසරේ සිංහල පොතේ පාඩමක් විදිහට යොදාගෙන තිබුණා මතකයි.මහා ඝන වනාන්තරයක අතරමං වන ගැටවරයන් තුන් දෙනෙක් පිළිබඳ කතාවක්.

ඇත්තටම අපේ කාලයේ අප කියවූ යොවුන් නවකතා ගැන මේ කතාබහේ මූලික අරමුණ වුණේ අප සියල්ලන් කියවූ යොවුන් නවකතා ගැන විස්තර, ඒ පිළිබඳ අදහස් හුවමාරු කරගැනීමයි.නොදන්නා දේ දැන ගැනීමයි. 

2014/08/30

අලි ඇතුන්ගේ ලෝකයේ කොන්දෙසි විරහිත සත්කාරකයා.

සුජීව ගැන ඔත්තුව මුලින්ම මට ලබාදෙන්නේ අපේ හසිත. මව්බිමේ පරිසර කතෘ .
'
මල්ලි, නියම පොරක් ඉන්නවා .මෑන් කැලෑ අලින්ගෙ පිටිපස්සෙන් ගිහින්චිත්‍ර අඳිනවා.මාර ලස්සනයි. ගිහින් හම්බ වෙලා ,කතාකරලා ,ආර්ටිකල්  එකක් කරපන්.' ඔන්න ඔය විදිහට තමයි මම සුජීව චන්දන ගැන ආර්ටිකල් එකක් කරන්නේ .

සුජීව චන්දන හෙවත් කැලෑ සුජියා හම්බ වෙන්න මම මීගොඩ ගියා.තලගල පැත්තට කිට්ටු වෙනකොට මම් බයික් එක නතර කරලා පාර ඇහුවා.
''
අලුත් මීගොඩටද, පරණ මීගොඩටද?'
හෑ බොලේ එහෙමත් එකක් තියෙනවද,හොයලා බැලින්නම් ඒ බෙදීමත් පෝස්ට් එකක් ලියන්න වටින කතාවක්.ඒක පසුවට.

සුජියා මට පාර පෙන්වන්න එයාගෙ පරණ පන්නයේ සුසුකි වර්ගයේ යතුරු පැදියෙන් මගට ඇවිත් හිටියා.

සුජීව ගැන මම පත්තරේට ලියපු නැති දේවල් බොහෝමයි.ඒ කාරණා හැමදේම ලියවෙද්දි  මේ පෝස්ට් එක ටිකක් අපිළිවෙල වේවි.
සුජීව ලංකාව පුරාම ,වැඩිපුරම රජරට ප්‍රදේශයේ කැලෑවල ඇවිදිනවා.ඔහුගේ ආදරය සහ ආශාව යොමුවුණු වනසත්තු වෙන්නෙ අලි ඇත්තු.එයා අලි ඇතුන් ගැන ඉගෙන ගන්නේම හැදෑරීමෙන්මයි.හරියටම කියනවා නම් කැලේ අලි ඇතුන් පිටුපස ගෑටීමෙන්මයි.අලිඇතුන් ගැන විතරක්ම නෙමෙයි,බොහෝ සතා සීපාවන් ගැන දැනීමක් අවබෝධයක් වගේම භාවිතාවකුත් සුජීවට තියෙනවා 

මම සුජීවගේ අගය කරන අනෙකුත් කාරණාව වුණේ අනාගත් ප්‍රතිලාභ ගැන නොසිතා ,සරලව කීවොත් සත පණහකවත් ලාභයක් බලාපොරොත්තු නොවී කොන්දේසි විරහිතව තමන්ගේ විනෝදාංශය වෙනුවෙන් කැපවීම.



සුජීව කීව විදිහට රජරට පැත්තෙ ඈත කැලෑ ගම්මාන හරහා අලිම්ංකඩවලට ඔහු යන්නේ අර පරණ යතුරු පැදියෙන්. සමහර දවස් වල අන්තරාදායක විදිහට රැකියාව පවා අනතුරේ හෙලාගෙන.සුජීව සිරස ආයතනයේ ඇනිමේටර් වරයෙක් විදිහට වැඩකරනවා.
 

වෙන කවරදාටත් වැඩියෙන් අද ලංකාවෙ වන අලින් ජාවාරම ජයටම වෙනවා.ඒ පිටිපස්සේ ඉන්න මිනිස්සු ගැන,හාමුදුරුවරු ගැන සුජීව වගේ වන ලෝලීන් හොදට දන්නවා.අපිත් දන්නවා,නමුත් ඒවා හෙළි කිරීමෙන් ඵලක් නැහැ කියලා අපි වගේම සුජිවලත් දන්නවා.මෙ වීඩියෝ ක්ලිප් කීපය අවධානයෙන් බැලුවොත් ඔබට පෙනේවි  සුජීව  ඇතුළෙ ඉන්න චිත්‍රශිල්පියා වගෙම  නිර්ව්‍යාජ වනලෝලියා.ඒ වගේම මේ වගේ  පෝස්ට් එකක් ලියන්න මට හිතුණේ ලංකාවෙ පත්තර නොකියවන අන්තර්ජාලය බාවිතා කරන පාඨක සමාජයට සුජීව හදුන්වා දීමට උවමනාවක් ඇතිවුණු නිසයි.සුජීව මුහුණුපොතේ නම් ඉන්නවා .මෙන්න මේතනින් යන්න.නමුත් බොහෝදෙනා දන්නා චිත්‍ර අඳින සුජීව වෙනුවට ලංකාවේ වන සත්ව පරපුර වෙනුවෙන් අතින් කාගෙන හරක් බලනවා වගේ වැඩක් කරන සුජීව ගැන පෙන්නලා දෙන්න මට හිතුණ.


2014/08/27

කුරුල්ලනේ හැමදාමත් කුරුළු පාලුවට වහන්න.......

කුරුල්ලනේ  හැමදාමත් කුරුළු පාලුවට වහන්න.......

 බොහෝම දුර බැහැර මතකයක හිත පැටළුණේ මම ලියපු පරණ කවි පිටු දෙක තුනක් පිහිරද්දී.කවියකට අකුරු නොගළපාම කොයි තරම් නම් කාලයක් ගතවෙලා ගිහින්ද?  කාබන් බොඳ වෙලා ගිය කඩදාසිය කියවගන්න අමාරු වුණේ නම් නැහැ.
ඇළ අද්දර තුරු වඳුලේ 
හීතල හෙවණේ වැතිරුණ 
ළපටි අතින් අස්වැද්දූ 
'කුරුලු පාලුවේ ' ලියැද්ද 
පැහී කරල් බිමට නැවී 
සරුසාරෙට හිනැහෙන හැටි.
කුරුල්ලනේ හැමදාමත් කුරුලු පාලුව ට නොඑන්න 

පුංචි සන්දියේ කුඹුරු වැපුරුමට පස්සෙ හවසට කුරුල්ලන් එළවන්න යන එක අපේ අනිවාර්‍ය රාජකාරියක්. වපුරපු පැළ වී කන්න එන කුරුල්ලන් ගණන නිමක් නැහැ. ගිරව් තමා මූලිකයෝ. ඊළගට වටු කුරුල්ලෝ.උන් හරිම පුංචි සත්තු ජාතියක්. ලියද්දට වහන්නේ මහා සේනාවක් එක්ක.කතාවට කීවොත් උන් රංචුව පියාඹගෙන යද්දී මැවෙන හුළං පාරට අපේ කෙස් රොදවල් හුළගෙ ගිහින් ඇස් පියවෙනවා. නමුත් ඇත්තටම එහෙම වෙන්නෙ නැහැ. 


           
ඊළග අය තමයි වඩු කුරුල්ලො .අර හරි අපූරු කුඩු තනන ගෘහ නිර්මාණ ශිල්පියෝ.නමුත් එයාලා නම් මහ විශාල රංචු එක්ක ලියද්දට බහින්නේ නැහැ.තව ඉන්නවා වී කුරුල්ලො කියලා කොට්ඨාසෙකුත් හැබැයි මට නම් හැමදාම සැකයක් තිබුණා මේ වී කුරුල්ලෝ කියන්නේ වටු කුරුල්ලන්ටමයි කියලා හරිම එක වගේ. 

කුඹුරු අයිනෙ තිබුණු කුඩා දිය පාර දිගටම සාරෙට එක පොකුරට වැඩුණු වැටකෙයා පඳුරු තියෙනවා ඒ පඳුරු වල කටු සහිත කොළ කපාගෙන ගිහින් තමයි අපෙ අම්මලා පැඳුරු වට්ටි පෙට්ටි මලු වියන්නෙ.මෙ පඳුරු අස්සෙ ඉන්නවා කොරව්ක්කු ,මේ යක්කුත් එනවා ලියද්දෙ වී අහුලන්න.උන් පියාඹනවට වඩා වැඩි දුරක් ඇවිදිනවා මගෙ හිතේ. 

ඊළග අමාරුකාරයෝ තමයි කොබෙයියෝ. අප්පේ දෙන වදයක්.එක තැනකින් එළෙව්වට පස්සේ ආයිමත් කැරකිලා ගිහින් ඒ ලියැද්දෙම තව කොණක වහනවා. තව මොණරු  එයාලා එනවාට අකැමැතිම අපි නෙමෙයි අප්පච්චිලා. ඇයි ඉතින් වී කනවට වඩා උන්ගෙ ලොකු කකුල් වලට යටවෙලා ගොඩක් වි ඇට මඩේ කුණුවෙනවානෙ .

ලියැද්දට එන අනෙක් විනාසකාරයො ටික රාජකාරි බාර ගන්නෙ රෑට.මෙයාලට කියන්නෙ සේරු කියලයි.සමහර පළාත්වල සේරාවො කියන්නේත් මේ ඇත්තන්ටම තමා කියලයි මම හිතන්නෙ.

සමහර කාලවලට වැපුරුමෙන් පස්සෙ නොහිතූ විදිහට වහිනවා. ලියැදි වල වක්කඩ හිර කරලා තිබුණොතින් දෙයියන්ගේම පිහිටයි. ලියැදි වල වතුර පිරුණු හැටියේ සේරාවො රංචු පිටින් ඇවිදින් වපුරපුවී ටික කනවා. මේ සේරාවෝ වතුරෙ පාවෙනවා හරියට තාරාවෝ වගේ.
දැන් මම් මෙ හැමදේම කිව්වේ පූර්විකාව විදිහට.කුරුල්ලන් එළවන්නෙයි කියලා කුඹුරට ගියත් අපි ආසා කරේ උන් ඇවිත් වී කනවට.අපි විතරක් නෙමෙයි අපේ අප්පච්චිලත් කුරුල්ලො කුඹුරට එනවට ආසා කෙරුවා.අප්පච්චිලා අස්සැද්දුවෙ කුරුලු කොබෙයියන්ටත් එක්කමයි.හැම කුඹුරකම අන්තිම කෙළවරේ පුංචි ලියැදි දෙක තුනක් තිබුණා.ඒවට කිව්වෙ 'කනටි කෑලි' කියලයි.මේ කනටි කෑලි අපේ අප්පච්චිලා හැදින්නුවේ කුරුලු පාලුව කියලා.ඒ' තමයි කුරුල්ලන් ගෙන් අස්වැන්නට වෙන හානියේ පාඩුවෙ හිලව්ව .කවදාවත් ගොවිතැනේ මහ අස්වැන්නට මේ කුරුළු පාලුවේ ලියැදි වල අස්වැන්න අපේ අප්පච්චිලා එක්කාසු කරගත්තේ නැහැ.කුරුලු පාලුවේ අස්වැන්නෙ අයිතිකාරයෝ වුණේ පුංචි අපි.

මේ හැමදේම ත් එක්ක මට හිතුණෙ අපේ අප්පච්චිලාගෙ බොසත් ගුණය කොයි තරම් ද කියලයි. තමන්ගෙ අනිකා ගැනවත් නොහිතන ලොකේ කුරුළු කොබෙයියන්ගේ සාගින්න ගැනත් හිතන්න පුළුවන් කම බෝසත් ගුණය නෙමෙයි නම් වෙන මොකද්ද ? මම හැමදාමත්ම මාසයකට දෙකකට වතාවක් ගමේ ගිහින් එන්න යනවා. ඒත් කුරුල්ලො එළවන්න යන පුංචි උන් දැන් ගමේ දකින්න නැහැ.කුරුළු පාලුවේ ලියැද්දත් නැහැ.මට තේරුණා කුරුල්ලනුත් නැති වග.


2014/08/14

මොහුගේ කට හඩට පිටුපා යා නොහැක


විල්සන් හෑගොඩ කොළඹ කවි යුගය එකළු කළ අපූර්ව කවීත්වයක් හිමිව තිබූ කවියෙකි."කවි කොළ කාරයා' යනු ඔහු විසින් පබදින ලද එවැනි  කවි පන්තියකි.එකල සමාජයේ කවි කොළ කාරයාට හිමිව තිබු තැන පිළිබදව් සමාජ විද්‍යාත්මක ගවේෂණයකට අවැසි තොරතුරු උවද ඔහුගේ මෙම කවි පන්තියෙන් උකහා ගන්නට පුළුවන. කොළඹ කවි කියවා රසවිදින්නට කැමැති වර්තමාන බ්ලොග් කියවන්නන්ගේ පහන් රසවින්දනය උදෙසා එය මෙලෙස ඉදිරිපත් කරන්නෙමි.


වම් අත කණේ- කවි කොළ ටික දකුණු         අත 
හක්කේ බුලත් විට හපවී ඉවර                 නැත
නෙත් සැර වරින් වර යවමින් සෙනග         වෙත  
හඩදී ගිරිය පාදා කවි කියනු                   ඇත 

ගෙදරින් තරුණියක ගෙනගිය පුවත      හොරෙන් 
බිහිසුණු මිනීමැරුමක වග රුහුණු           ක-රෙන් 
රිය අනතුරක සැණකෙළියක පැසුළු       දොරෙන් 
තොරතුරු ඇදී එයි මොහු වෙත විදුලි      සැරෙන් 

සුළු පුවතක් නමුදු ගණනට ගත           නොහෙන 
ඔපයක් අමුතුවෙන් දී නව පණ              ගැහෙන 
කවි වැලකට ගොතා ගෙන නව නළු රස   වැහෙන 
කියවයි ගැඹුරු හඬකින් ඈතට              ඇහෙන 

පිංකම් පොළක -ගම්බඳ වෙළදම්            පොළක 
බස් නැවතුම් පොළක හෝ මහ මං            කඩක 
කඩ මන්ඩියක් රුක් සෙවණක් වැනි           තැනක 
මොහුගේ කට හඩට පිටුපා යා              නොහැක 

කිසි මඟියකුට මුණ නොගැහී සිටිනු             බැරී 
එළිමහනකම හඬ දෙන විට කොතැන           හරි 
ආරංචියේ උණුසුම් කම අනුව                    හැරී 
මොහු වට කොට බලා ඇත මහ සෙනඟ         පිරී 

මොහු පළ කරන කවි කොළ එකිනෙක         දේට 
රසවත් වී තිබේ ,පොදු     ගම්              වැසියාට 
එක ශත දහය ගණනේ මිළ                 තිබුණාට 
විකිණෙයි දහස් ගණනින්                 සමහර දාට